РЗА ХХК нь Оюутолгой ХХК-ийн уурхайн талбай дахь 220/35 кВ-ын хүчний 10 трансформаторт Сержи ХХК-ийн Transformer Depressurization System (TDS) буюу трансформаторын дэлбэрэлтийн эсрэг хамгаалалтын системийг амжилттай суурилууллаа. Энэхүү ажил нь өндөр чадлын цахилгаан тоноглолын аюулгүй ажиллагааг шинэ түвшинд хүргэж, уурхайн найдвартай ажиллагааг хангах чухал алхам боллоо.

Системийн тухай ерөнхий ойлголт

Transformer Depressurization System (TDS) нь трансформаторын дотор үүсэх гэнэтийн даралтын өсөлтөөс үүдэлтэй дэлбэрэлт, галын эрсдэлийг бууруулах зориулалттай хамгаалалтын шийдэл юм. Ихэвчлэн дотоод богино холболт, тусгаарлагчийн гэмтэл зэрэг шалтгаанаар трансформаторын тос огцом халах үед даралт маш хурдан нэмэгдэж, улмаар сав задрах, дэлбэрэх аюул үүсдэг. TDS систем нь энэ процессыг эхний хэдхэн миллисекундэд мэдэрч, даралтыг аюулгүйгээр гадагшлуулах замаар дэлбэрэлтийг зогсоодог.

Үндсэн ажиллах зарчим

• Хэт даралт илрүүлэх: Трансформатор доторх даралт ~0.2–0.5 бар-аас дээш хурдтай өсөх үед мэдрэгчүүд идэвхждэг.

• Хариу үйлдлийн хугацаа: Систем нь ойролцоогоор 2–10 миллисекунд дотор ажиллаж эхэлдэг.

• Даралт бууруулах механизм: Тусгай хурдан нээгддэг клапан (fast-acting valve) нээгдэж, тос ба хий холимгийг чиглүүлэн гаргана.

• Галын тархалтаас сэргийлэх: Зарим тохиолдолд тосыг тусгай сав (oil segregation tank) руу шилжүүлж, агаартай холилдохоос хамгаалдаг.